फलटण ( किरण बोळे ) :
सदा माझे डोळे जडो तुझे मुर्ती 1
रखुमाईच्या पती सोयरिया 11 १ 11
गोड तुझे रुप गोड तुझे नाम 1
देई मज प्रेम सर्वकाळ 11 धृ 11
विठो माऊलीये हाची वर देई 1
संचरोनी राही हृदयामाजी 11 २ 11
तुका म्हणे काही न मागे आणिक 1
तुझे पायी सुख सर्व आहे 11 ३ 11
या भावनेने विठ्ठल दर्शनाच्या ओढीने ‘ज्ञानोबा माऊली तुकाराम….तुकाराम’ सह विठ्ठल नामाच्या जयघोषात व टाळ मृदुंगाच्या गजरात पंढरपुराकडे वाटचाल करणारा लाखो वैष्णवांचा मेळा आज शनिवार दि. २८ रोजी महानुभाव व जैन पंथीयांची काशी समजल्या जाणाऱ्या ऐतिहासिक फलटण नगरीत मुक्कामासाठी विसावला. दरम्यान उद्या दि. २९ रोजी हा पालखी सोहळा जिल्ह्यातील शेवटच्या मुक्कामाकरीता बरड येथे विसावणार आहे.
तरडगाव येथून प्रस्थानानंतर पालखी मार्गावरील गावोगावी झालेल्या स्वागताचा स्विकार करुन श्री संतश्रेष्ठ ज्ञानेश्वर महाराजांचा पालखी सोहळा लाखो विठ्ठल भक्तांसमवेत संध्याकाळी पाचच्या सुमारास फलटण शहरात दाखल झाला. टाळ मृदुंगाच्या गजरात व हरी नामाच्या जयघोषात विठु दर्शनाची आस घेऊन निघालेल्या या सोहळ्याचे शहराच्या प्रवेशद्वारावर फलटण नगरपरिषदेचे मुख्याधिकारी निखिल मोरे व नगर परिषदेतील विविध विभागाचे अधिकारी व अन्य माण्यवरांनी स्वागत केले. माऊलींचा हा सोहळा शहरात दाखल झाल्यानंतर तो मलठण, सदगुरु हरीबुवा मंदिर, पाचबत्ती चौक या मार्गे ऐतिहासिक श्री राम मंदिराजवळ आला. यावेळी नाईक निंबाळकर देवस्थान ट्रस्ट च्या वतीने माऊलींसह लाखो भाविकांच्या जनसमुदायाचे स्वागत सातारा जिल्हा परिषदेचे माजी अध्यक्ष संजीवराजे नाईक निंबाळकर, माजी जिल्हा परिषद सदस्या शिवांजलीराजे नाईक निंबाळकर, फलटण पंचायत समितीचे माजी सभापती विश्वजितराजे नाईक निंबाळकर यांच्यासह राजघराण्यातील अन्य मान्यवरांनी केले.
त्यानंतर पालखी सोहळा गजानन चौक, महात्मा फुले चौक, गिरवी नाका मार्गे फलटण येथील विमान तळावर मुक्कामासाठी संध्याकाळी सहा वाजता विसावला. वारीत चालणाऱ्या लाखो वारकऱ्यांपासुन शहर व तालुक्यातील गावकऱ्यांच्या उपस्थितीत समाज आरती करण्यात आली. समाज आरती नंतर माऊलींच्या दर्शनासाठी फलटणरांनी मोठ्या रांगा लावल्या.
आज पालखी सोहळ्याच्या आगमनामुळे शहरात सर्वत्र ‘उत्सव आनंदाचा चैतन्याचा, स्फुर्तीचा, उत्सव माउलींच्या विठ्ठल भक्तीचा’ असे वातावरण होते. पालखी सोहळ्याचे आगमन शहरात जरी संध्याकाळी झाले असले तरी वारकऱ्यांचे सकाळपासुनच शहरात मोठ्या प्रमाणात आगमन होत होते. सर्वत्र टाळ मृदुंगाचा गजर व हरी नामाचा जयघोष व भगव्या पताका या मुळे अवघे शहर विठ्ठलमय झाल्याचे दृष्य सर्वत्र दिसुन येत होते. शहरात दिवसभर विविध सहकारी व सामाजिक संस्था, सार्वजनिक मंडळे व फलटणवासीयांकडून ठिकठिकानी मोफत पाणी, चहा, बिस्किटे, अल्पोपहार, फळेवाटप, जेवणाची सोय वारकऱ्यांसाठी करण्यात आली होती. पालखी सोहळ्यात सहभागी झालेल्या वारकऱ्यांच्या सेवेसाठी लहानांपासून थोरांपर्यंत प्रत्येक जण आपआपल्या परीने प्रयत्नशील असल्याचे चित्र फलटण शहर व परिसरात सर्वत्र दिसून येत होते.
दरम्यान वारकऱ्यांना अडचणी येवु नयेत या करीता नीरा उजवा कालव्यात पाणी सोडण्यात आले होते त्या मुळे आंघोळ व कपडे धुण्याची उत्तम सोय झाली. या व्यतिरिक्त दि. २८ रोजी सकाळी सहा वाजता पालखी सोहळ्याकरिता नीरा उजवा कालव्यावरील २० फाट्याला आठ क्यूसेक्स, २२, २३ व २४ फाट्याला प्रत्येकी पाच क्यूसेक्स, २५ फाट्याला दोन क्यूसेक्स व २६ फाट्याला दहा क्यूसेक्स पाणी सोडण्यात आले होते. वारकऱ्यांसाठी पिण्यास पाणी टँकरद्वारे पुरविण्यात आले. पालखी तळावर तात्पुरत्या स्वरुपात शौचालये व स्वच्छता गृहे उभारण्यात आली होती. पुरवठा विभागाच्या वतीने पालखी तळावर गँस सिलेंडर उपलब्ध करुन देण्यात आले होते. आरोग्य विभागाच्यावतीने आरोग्य तपासणी व औषधांचे वाटप करण्यात येत होते. वीज वितरण कंपनीच्या वतीने वीज पुरवठा खंडित होणार नाही याची व्यवस्था केली होती. वारकर्यांच्या समस्यांचे व तक्रारींचे निवारण करण्यासाठी पालखी तळावर नगरपालीकेच्या वतीने मदत केंद्र कक्ष उभारण्यात आला होता. फलटण बस स्थानका समोर यशवंतराव चव्हाण हायस्कूलच्या मैदानात नगरपालिकेने उभारण्यात आलेल्या भव्य मंडपात हजारो वारकरी विश्रांतीसाठी विसावले.
दरम्यान उद्या रविवार दिनांक २९ जुन रोजी फलटण येथून सकाळी सहा वाजता पालखी सोहळ्याचे प्रस्थान होणार आहे. सकाळी विडणी येथे न्याहरी, पिंप्रद येथे दुपारचे भोजन, वाजेगाव येथे विसावा घेवुन हा सोहळा सातारा जिल्ह्यातील शेवटच्या मुक्कामाला बरड येथे संध्याकाळी दाखल होणार आहे. सोमवार दिनांक ३० जुन रोजी हा वैष्णवांचा मेळा सातारा जिल्ह्याचा निरोप घेऊन दुपारी सोलापूर जिल्ह्यात प्रवेश करणार आहे.
