फलटण : मॅग व माऊली फाउंडेशन यांच्यावतीने फलटण येथे आयोजित करण्यात आलेल्या वक्तृत्व स्पर्धेत जिल्हा परिषद प्राथमिक केंद्रशाळा जावली ता. फलटण ची इयत्ता तिसरीची विद्यार्थिनी कु. राजनंदिनी विठ्ठल पडर हिने प्रथम क्रमांक मिळविला आहे.
क्रांतीज्योती सावित्रीबाई फुले यांच्या जयंतीनिमित्त या वक्तृत्व स्पर्धेचे आयोजन करण्यात आले होते. सदर स्पर्धेत वेगवेगळ्या विषयांवर सुमारे साडेतीनशे विद्यार्थ्यांनी सहभाग नोंदवला होता. या स्पर्धेत कु. राजनंदिनी विठ्ठल पडर हिने ‘माझे स्वप्न’ या विषयावर प्रभावीपणे आपले विचार मांडले होते व विषय सादरीकरण केले होते. सदर वक्तृत्व स्पर्धेचा बक्षीस वितरण समारंभ दि. १ फेब्रुवारी रोजी अनंत मंगल कार्यालय फलटण येथे संपन्न झाला. प्रथम क्रमांक मिळाल्याबदद्ल राजनंदिनी पडर हिचा रोख रक्कम, सन्मानपत्र, गौरवचिन्ह व पुस्तक भेट देऊन सत्कार करण्यात आला. यावेळी मॅग फाऊंडेशनचे अध्यक्ष अनंता मोहोटकर, माऊली फाउंडेशनचे कार्याध्यक्ष ॲड. विश्वनाथ टाळकुटे, प्रसिद्ध व्याख्याते राजेश मंत्री, मुधोजी काॅलेजचे प्रा. बाळासाहेब कांबळे, प्रा. नितीन नाळे आदी मान्यवर उपस्थित होते.
राजनंदिनीने मिळविलेल्या या यशाबद्दल तिचे राजकीय, सामाजिक, शैक्षणिकसह विविध क्षेत्रातील मान्यवरांकडून व जावली व पंचक्रोशीतील ग्रामस्थांकडून अभिनंदन व्यक्त होत आहे.
