फलटण : विधानसभा निवडणुकीत प्रत्येक मतदाराने आपला मतदानाचा हक्क बजवावा. मतदारांनी या दिवशी घराबाहेर पडून आपला मतदानाचा हक्क बजावून मतदानाची टक्केवारी वाढवावी असे आवाहन निवडणुक निरीक्षक नुह पी. बावा यांनी फलटण विधानसभा मतदार संघातील मतदारांना केले आहे.
विधानसभा सार्वत्रिक निवडणुक २०२४ च्या अनुषंगाने निवडणुक आयोगामार्फत मतदानाची टक्केवारी वाढविण्यासाठी स्वीप कार्यक्रमांतर्गत मतदारांमध्ये जनजागृती करण्याच्या अनुषंगाने फलटण (अ.जा) विधानसभा मतदारसंघामध्ये दि. ४ नोव्हेंबर रोजी निवडणुक निरीक्षक नुह पी. बावा (IAS) यांच्या प्रमुख उपस्थितीत मुधोजी हायस्कूलच्या प्रांगणात मतदान जनजागृतीचा कार्यक्रम संपन्न झाला, त्यावेळी त्यांनी मतदारांना सदर आवाहन केले. यावेळी सहाय्यक निवडणूक निर्णय अधिकारी तथा तहसीलदार डॉ. अभिजित जाधव, स्वीप नोडल अधिकारी सचिन जाधव आदींची उपस्थिती होती.
फलटण विधानसभा मतदार संघामध्ये मतदानाची टक्केवारी वाढविण्यासाठी, स्वीप अंतर्गत मतदान जनजागृतीचे विविध उपक्रम निवडणुक निर्णय अधिकारी तथा उपविभागीय अधिकारी, फलटण सचिन ढोले यांच्या मार्गदर्शनाखाली राबविण्यात येत असल्याचे यावेळी सहाय्यक निवडणूक निर्णय अधिकारी डॉ. अभिजित जाधव यांनी यावेळी निदर्शनास आणून दिले.
स्वीप नोडल अधिकारी सचिन जाधव यांनी कार्यक्रमाचे प्रास्तविक करून नागरिकांना २० नोव्हेंबर २०२४ रोजी मतदान करणेबाबतची प्रतिज्ञा दिली.
या वेळी फलटण शहरातील बी.एल.ओ. पर्यवेक्षक, बी.एल.ओ., स्वीप टिम आणि मतदार मोठया संख्येने उपस्थित होते.
